ബ്ലോത്രം: 24ആഗസ്റ്റ്2009 - ബ്ലോഗര്‍ + ബ്രാന്ത്...????

ബ്ലോഗര്‍മാരുടെ ഭ്രാന്ത് !

എല്ലാ ബ്ലോഗര്‍മാരും നിശ്ചിത അളവില്‍ ഭ്രാന്തുള്ളവരാണെന്നാണ് ചിത്രകാരന്റെ പുതിയ കണ്ടുപിടുത്തം ! കുറഞ്ഞ ഭ്രാന്ത്, കൂടിയ ഭ്രാന്ത് എന്ന വ്യത്യാസമേയുള്ളു.(ബ്ലോഗര്‍മാരുടെ ഭ്രാന്തിനെ “ബ്രാന്ത്” എന്നേ പറയാവു എന്ന് ചിലര്‍ക്ക് നിര്‍ബന്ധമാണ്. ഭ്രാന്തിന് വേലികെട്ടുന്നതില്‍ വിശ്വാസമില്ലാത്തതിനാല്‍ ചിത്രകാരന്‍ അതൊന്നും കാര്യമാക്കുന്നില്ല.)

ഓരോ ബ്ലോഗറും ഒരു ഭ്രാന്തനാണെന്ന ഈ മഹനീയ കണ്ടുപിടുത്തത്തിന്റെ ആത്മ നിര്‍വൃതിയില്‍ ചിത്രകാരന്‍ അനിര്‍വചനീയ ആനന്ദം അനുഭവിക്കുകയാണ്. ഇതുവരെ ചിത്രകാരനും ചില അപൂര്‍വ്വം കവികള്‍ക്കും മത്രമേ ഭ്രാന്തുള്ളു എന്ന സങ്കടത്തിലായിരുന്നു കഴിഞ്ഞുകൂടിയിരുന്നത്. ഈ ചിന്തഗതിയില്‍ ഒരു കുതിച്ചുചാട്ടം തന്നെ നടത്താന്‍ കഴിഞ്ഞിരിക്കുന്നു ! സര്‍വ്വത്ര ഭ്രാന്താണ് ബൂലോകം....അങ്ങനെ, ബ്രാന്താലയം എന്ന് ബൂലോകത്തെ വിശേഷിപ്പിച്ച ആദ്യ ബ്ലോഗറാണ് ചിത്രകാരന്‍ എന്ന വസ്തുത ചരിത്രകാരന്മാര്‍ ഓര്‍ത്തുവക്കുക .....
-ചിത്രകാരന്‍.

കേരളം ലജ്ജിക്കണം

“മന്ത്രി എന്‍.എസ്സ്.എസ്സ്. നേതൃത്വവുമായി പെരുന്നയില്‍ കുടി കാഴ്ച നടത്തി”
“മന്ത്രി വെള്ളാപള്ളിയെ കണിച്ചുകുളങ്ങരയിലെ വസതിയില്‍ ചെന്ന് കണ്ടു”
"മന്ത്രി ആര്‍ച്ച് ബിഷപ്പ് ഹൌസില്‍ പവ്വത്തിലുമായി കൂടി കാഴ്ച നടത്തി”

മന്ത്രിയുടെ ഇരട്ടത്താപ്പ് നോക്കൂ. ഒരു സമുദായത്തിന്റെ “നേതാക്കളെ” ഓഫീസില്‍ ചെന്ന് കണ്ടപ്പോള്‍ മറ്റൊരു സമുദായത്തിന്റെ “സെക്രട്ടറിയെ” വീട്ടില്‍ ചെന്ന് കണ്ടിരിക്കുന്നു.... ദേവസ്വം മന്ത്രി എന്തിനാണാവോ ബിഷപ്പ് ഹൌസില്‍ എത്തിയത്....
-മനോജ്.

`പരേതന്‍ നിയമക്കുരുക്കില്‍`

മരണം രംഗബോധമില്ലാത്ത കോമാളിയെന്ന്‌ പറഞ്ഞുകേട്ടിട്ടില്ലേ.. ഈ കോമാളി എപ്പം എങ്ങന എവിടെവച്ച്‌ കടന്നുവരുമെന്ന്‌ പറയാന്‍ സാധിക്കില്ല... പുപ്പുലിക്ക്‌ പരിചയമുള്ള രണ്ടുപേര്‍ ഈ `കോമാളി'ക്കു മുന്നില്‍ ഈയിടെ കീഴടങ്ങി. (പരേതരുടെ യഥാര്‍ത്ഥ പേരും വിലാസവും പുപ്പുലി മനപൂര്‍വ്വം മറച്ചുവയ്‌ക്കുകയാണ്‌. പേര്‌ വ്യാജമാണെങ്കിലും സംഭവം ഒറിജിനലാണ്‌.)

സത്യനാദന്‍ എന്ന്‌ നമുക്ക്‌ ആദ്യയാളെ വിളിക്കാം. ജീവിതത്തില്‍ സത്യനാദന്‍ സത്യം മാത്രമേ പ്രവര്‍ത്തിച്ചിട്ടുള്ളു. ആ പേരിനോട്‌ തികഞ്ഞ കൂറു കാണിച്ചു. പെട്ടെന്നുണ്ടായ ഒരു നെഞ്ചുവേദനകാരണമാണ്‌ സത്യനാദനെ മെഡിക്കല്‍ കോളേജ്‌ ആശുപത്രിയിലേക്കെത്തിച്ചത്‌....

-തിരോന്തരം പുപ്പുലി.

പന്നിപ്പനി, ഒരു അമേരിയ്ക്കന്‍ ഗൂഢാലോചന..?

ഇന്തോനേഷ്യയെയും ഇന്ത്യയെയുമൊക്കെ ഞെട്ടിച്ച് പതിനായിരങ്ങളുടെ ജീവന്‍ കവര്‍ന്ന സുനാമി ഇന്ത്യന്‍ മഹാ സമിദ്രത്തിലുണ്ടായിരുന്ന അമേരിയ്ക്കന്‍ ബുദ്ധിയുടെ സൃഷ്ടിയായിരുന്നുവെന്ന് മുമ്പ് ഒരു പ്രമുഖ ദിനപ്പത്രം റിപ്പോര്‍ട്ടു ചെയ്തിരുന്നു. സെന്റീമീറ്റര്‍ക്യൂബില്‍ ലക്ഷക്കണക്കിനു ടണ്‍ പ്രഹരശേഷി പ്രയോഗിച്ചപ്പോള്‍ (സത്യമോ മിത്ഥ്യയോ) അതിന്റെ ഫലം നാമറിയുകയും ചെയ്തു. ഇപ്പോള്‍ പന്നിപ്പനിയുടെ ഉറവിടവും മറ്റൊരിടമല്ലെന്നു റിപ്പോര്‍ട്ടു ചെയ്യപ്പെടുന്നു. ശരിയായാലും തെറ്റായാലും അതേക്കുറിച്ച് ഒന്നു ചിന്തിയ്ക്കുന്നത് നല്ലതുതന്നെ...
-കൊട്ടോട്ടിക്കാരന്‍.

5 ഉല്‍പ്പന്നവും അയ്യായിരത്തിന്റെ വിലയും

കാപ്പി, കുരുമുളക്, തേയില, നാളികേരം എന്നീ 'നാലുല്‍പ്പന്നങ്ങളു'ടെ കാര്യം ഊതിവീര്‍പ്പിച്ചാണ് ഇടതുപക്ഷം 'നാടാകെ വിവാദം' സൃഷ്ടിക്കുന്നതെന്നാണ് പ്രതിപക്ഷനേതാവ് ഉമ്മന്‍ചാണ്ടി എഴുതിയിരിക്കുന്നത്. അദ്ദേഹത്തിന്റെ ലിസ്റ്റില്‍ ഞാന്‍ ഒരു ഉല്‍പ്പന്നവുംകൂടി ഉള്‍പ്പെടുത്തുകയാണ്- റബര്‍. ബഹുമാനപ്പെട്ട പ്രതിപക്ഷനേതാവിനോടുള്ള എന്റെ ചോദ്യം ഇതാണ്. ഈ അഞ്ച് ഉല്‍പ്പന്നത്തെ മാറ്റിനിര്‍ത്തിയാല്‍ കേരളത്തിന്റെ കാര്‍ഷികമേഖലയില്‍ ബാക്കി എന്തുണ്ട്? എന്തിന് 12,169 ഉല്‍പ്പന്നം?..
-വക്കേഴ്സ് ഫോറം.

‘ചതയദിന’ചിന്തകൾ(അവർണരുടെ വിപ്ലവം വിജയിക്കാത്തതെന്തേ?)

ശ്രീനാരാ‍യണഗുരുവിന്റെ ജയന്തി അടുത്തു.പതിവുപോലെ ‘വിശ്വഗുരു’വെന്നും ‘ലോകം കണ്ട ഏറ്റവും വലിയ സാമൂഹിക പരിഷ്കർത്താവ്’ എന്നും ശ്രീനാരായണഗുരുവെ വിശേഷിപ്പിച്ചുകൊണ്ടുള്ള നോട്ടീസുകളും കട്ടൌട്ടുകളും പ്രസംഗങ്ങളുമായി എസ് എൻ ഡി പി യോഗം ശാഖകൾ രംഗത്തുവരും. ചതയദിനത്തിൻനാൾ എസ് എൻ ഡി പി സംഘടിപ്പിക്കുന്ന വേദികളിൽ വന്നിരുന്ന് മറ്റു സമുദായങ്ങളിൽ‌പ്പെട്ട രാഷ്ട്രീയ-സാമൂഹിക നേതാക്കളും, നാരായണഗുരുവെ വാനോളം പുകഴ്ത്തി, ‘അദ്ദേഹത്തിന്റെ സന്ദേശങ്ങളുടെ പ്രസക്തി എന്നെത്തേക്കാളും വർധിച്ചിരിക്കുന്നു’ എന്നു പ്രസംഗിച്ചിട്ടുപോകും. ഈഴവർ റാലികളും പ്രകടനങ്ങളും നടത്തി വെള്ളാപ്പള്ളിക്കു കൂടി ജയ് വിളിച്ചു പിരിഞ്ഞുപോകും. മടുപ്പിക്കുന്ന ഈ നാടകം എത്രയോ കാലമായി ഈ കേരളത്തിൽ അരങ്ങേറുന്നു!ഈഴവർക്കൊഴികെ മറ്റാർക്കെങ്കിലും ഈ കലാപരിപാടിയിൽ എന്നെങ്കിലും താത്പര്യമുണ്ടായിട്ടുണ്ടോ?....

-സത്യാന്വേഷി

Spotify: പാട്ട് കേള്‍ക്കാന്‍ നല്ലൊരു വഴി

എന്‍റെ ഇപ്പോഴത്തെ സീസണല്‍ ഒബ്സഷന്‍ Spotify എന്ന
സംവിധാനം. ഇത് ഡൌണ്‍ലോഡ് ചെയ്‌താല്‍ ഫ്രീ ആയി പാട്ടുകള്‍ കേള്‍ക്കാം.
കഷ്ടകാലത്തിന് ഫ്രീ വെര്‍ഷന്‍ യൂറോപ്പിലും അമേരിക്കയിലും മാത്രമേ
കിട്ടുകയുള്ളൂ എന്ന് തോന്നുന്നു. പ്രീമിയം ഏത് രാജ്യക്കാര്‍ക്കും കിട്ടും.

-മരമാക്രി.

ഇന്ത്യവിഷന്‍ ഏഷ്യാനെറ്റിന്റെ മണ്ടക്കടിക്കുന്നു

നികേഷ്‌ കുമാറിന്റെ വാര്‍ത്ത വായന എനിക്ക് വളരെ ഇഷ്ടമാണ്. വളരെ ചടുലവും ആവേശകരവുമാണ് നികേഷിന്റെ വായനാ രീതി. മലയാള വാര്‍ത്ത വായനക്കാര്‍ക്കിടയില്‍ നികേഷ്‌ ഒരു തരംഗം തന്നെ സൃഷ്ടിച്ചിട്ടുണ്ട്. കുഞ്ഞുകുട്ടി പരാധീനതകള്‍ ഏറെയുള്ള ഇന്ത്യാവിഷനെ അതിന്റെ തലപ്പത്തിരുന്നു ഒറ്റയാള്‍ പട്ടാളം കണക്കെ നയിക്കുന്നത് നികേഷ്‌ തന്നെ. മനോരമ, ഏഷ്യാനെറ്റ്‌ പോലുള്ള വന്‍ കുത്തകള്‍കിടയിലും ഈ കൊച്ചു ചാനല്‍ റേറ്റിംഗ് ഇടിയാതെ മുന്നോട്ടു പോവുന്നുണ്ട്. നികേഷ്‌ ചാടിയാല്‍ ഇന്ത്യവിഷന്റെ അപ്പീസ് പൂട്ടും എന്നായിരുന്നു എന്റെയൊരു കണക്കു കൂട്ടല്‍. എന്നാല്‍ ആ തോന്നല്‍ പൂര്‍ണമായും ശരിയല്ല എന്ന് ഇപ്പോള്‍ മനസ്സിലായി. വേറെയും ചില ആണ്‍ കുട്ടികള്‍ ഇന്ത്യാവിഷനിലുണ്ട്. ഇത് പറയാന്‍ കാരണമുണ്ട്. ഇന്നലെ മുതല്‍ ഏഷ്യാനെറ്റിന്റെ തലമണ്ടക്ക് ഇന്ത്യാവിഷന്‍ അടി തുടങ്ങിയിരിക്കുന്നു. വീ കെ സി സ്ട്രീറ്റ് ലൈറ്റ് ഒരൊന്നാന്തരം ചുറ്റികയാണ്. ഇത് കൊണ്ടുള്ള ഒന്ന് രണ്ടു അടി കിട്ടിയാല്‍ പെട്ടെന്നൊന്നും ബോധം തെളിയില്ല....
-ബഷീര്‍ വള്ളിക്കുന്ന്.

ഒരു നോമ്പുതുറയുടെ നോവ്‌

വീണ്ടും ഒരു നോമ്പുകാലം കൂടി വന്നെത്തി. നോമ്പിനെക്കുറിച്ചോര്‍ക്കുമ്പോള്‍ ഓര്‍മ്മയില്‍ ആദ്യം തെളിയുന്നത് നേര്‍ത്ത അരിപത്തിരിയും തേങ്ങ ചുവക്കെ വറുത്തരച്ച നല്ല എരിവുള്ള കോഴിക്കറിയുമാണ്‌. കാരണം എന്‍റെ ചെറുപ്പത്തില്‍ ഞങ്ങളുടെ ചുറ്റുമുള്ള മുസ്ലിം വീടുകളില്‍ നോമ്പിന് മാത്രമായിരുന്നു ഈ വിഭവം ഉണ്ടാക്കിയിരുന്നത്. നോമ്പുതുറക്കാന്‍ ഒന്നും പോകാറില്ലായിരുന്നുവെങ്കിലും പത്തിരിയും കറിയും അവര്‍ വീട്ടില്‍ കൊണ്ടുവന്നു തരുമായിരുന്നു.

ഏതാനും വര്‍ഷങ്ങള്‍ക്കു മുന്‍പ്‌ കോഴിക്കോട്‌ ജോലി ചെയ്യുന്ന കാലം. കോഴിക്കോട്ടെത്തിയ ശേഷം അക്കാലത്തെ എന്‍റെ സഹപ്രവര്‍ത്തകരായിരുന്ന സലീം, കമറു എന്നിവരോടൊപ്പം ഞാനും നോമ്പ്‌ എടുത്തിട്ടുണ്ട്. അങ്ങനെ അന്ന് നോമ്പ്‌ എടുത്താല്‍ നോമ്പ്‌ തുറക്കാന്‍ ഹോസ്റ്റലിലെ ഉണങ്ങിയ ഭക്ഷണം മാത്രം....
-മേരി ലില്ലി.

മറക്കാൻ പറ്റാത്ത ഒരു ഓർമ്മ

മറക്കാൻ ശ്രമിക്കും തോറും കൂടുതൽ മിഴിവോടെ മനസ്സിലേക്ക് വരുകയാണ് പലതും.ദിവസേന പത്രങ്ങളിൽ കൊലപാതകങ്ങളെ പറ്റി വാർത്തകൾ വരാറുണ്ട്.എങ്കിലും വീടിനടുത്ത് അങ്ങനെയൊരു സംഭവം നടന്നപ്പോൾ സത്യത്തിൽ ഞെട്ടിപ്പോയി.സംഭവം നടന്നിട്ട് ദിവസങ്ങൾ ആയെങ്കിലും ഇപ്പോഴും അത് മറക്കാൻ കഴിയുന്നില്ല.

സ്വന്തം ഭാര്യയെ ക്രൂരമായി കൊലപ്പെടുത്തി യുവാവ് തൂങ്ങി മരിച്ചു എന്ന വാർത്ത നിങ്ങളിൽ പലരും കണ്ടിരിക്കാം....
-മീര അനിരുദ്ധന്‍.

കമ്മ്യൂണിസ്റ്റുകാരെ പ്രേമിക്കരുതേ.. പ്ളീസ്‌!

ഇനിയുള്ള കാലത്ത്‌ പഠിച്ചിട്ടൊന്നും ഒരു ഉമ്മാക്കിയും അവാമ്പോണില്ല എന്ന ഒരു വിശ്വാസം രൂഢമൂലമായിരുന്ന ഒരു കാലഘട്ടമായിരുന്നു എന്‍റെ പത്താം ക്ളാസ്സ്‌ പഠനകാലം.പിന്നെ ഉച്ചയ്ക്ക്‌ പാച്ചറുടെ കടയില്‍ കിട്ടുന്ന പൂളക്കറി,പുട്ട്‌,പപ്പടം തുടങ്ങിയ ഐറ്റംസ്‌ ദിവസവും സ്കൂളില്‍ പൊവാനുള്ള ഒരു പ്രചോദനമായി നില കൊണ്ടു എന്നു വേണം പറയാന്‍.ഇപ്പോഴും ഇടയ്ക്ക്‌ നാട്ടില്‍ പൊവുമ്പോള്‍ പാച്ചറെ കാണുമ്പോള്‍ പഴയ ആ പൂളക്കറിയുടെയും,മസാല ദോശയുടെയും ഒക്കെ സ്വാദ്‌ വായില്‍ കപ്പലോടിക്കാറുണ്ട്‌....
-പ്രതീഷ് ദേവ്.

അദ്ധ്യാപകരെ കുറ്റം പറയരുത്!!

ഇത് എന്താ ഇത് എന്നു നിങ്ങള്‍ ചോദിച്ചേക്കാം
എന്നാല്‍ കാര്യം ശരിയാണ് .
നിങ്ങളുടെ മക്കളുടെ മുന്നില്‍ വെച്ച് ക്ലാസ് ടീച്ചറേയോ മറ്റ് അദ്ധ്യാപകരേയോ എന്തിനേറെ പറയുന്നു ട്യൂഷന്‍ മാഷിനെ പ്പോലും കുറ്റം പറയരുത് .
പറഞ്ഞാല്‍ പിന്നെ നിങ്ങളുടെ മകന്‍ / മകള്‍ പ്രസ്തുത വിഷയവുമായുള്ള ബന്ധം കഷ്ടം തന്നെയാകും . അതിനാല്‍ പ്രസ്തുത അദ്ധ്യാപകന് കുറ്റമുണ്ടെങ്കില്‍ പോലും അക്കാര്യം കുട്ടിയുടെ മുന്നില്‍ വെച്ച് മാതാപിതാക്കള്‍ സംസാരിക്കാതിരിക്കുകയാണ് ബുദ്ധി...
-കുട്ടമണി.

കള്ളിതങ്കമ്മ

പിള്ളേച്ചോ ..ചതിച്ചട .ആ കാലമാടന്‍ ഈ രാത്രിയില്‍ ചൂട്ടും കത്തിച്ച് വരുമെന്ന് ആരെങ്കിലും ഓര്‍ത്തോ ? നീ വേഗം ഉപ്പിടാത്ത ഒരു നാരങ്ങാ വെള്ളവും ഒരു മുറുക്കാനും വേഗമിങ്ങെടുത്തെ . ഇനി ആരെയൊക്കെ കണ്ടാല്‍ കാര്യം നടക്കും എന്‍റെ ഈശ്വരന്മാരെ ?..
-കാപ്പിലാന്‍.

സൈക്കിളിംഗ്‌ പഠനം എന്ന പീഢനം.

വളരെക്കാലത്തെ കാത്തിരിപ്പിന്‌ ശേഷം ഇന്നലെ മക്കള്‍ക്കായി ഒരു ബൈസിക്ക്‌ള്‍ വാങ്ങി.ഇന്നലെ കുറേ നേരം അവരതിന്മേല്‍ തന്നെയായിരുന്നു.ഇന്നും രാവിലെ മുതല്‍ അതിന്മേലാണ്‌.സൈക്കിളില്‍ അവരുടെ പ്രകടനം കണ്ടപ്പോഴാണ്‌ ഞാന്‍ സൈക്ലിംഗ്‌ പഠിച്ച ആ കുട്ടിക്കാലം മനസ്സില്‍ വന്നത്‌.

എന്നേയും അനിയനേയും എല്ലാവിധത്തിലും നന്നായി ശ്രദ്ധിച്ചിരുന്ന ബാപ്പ തന്നെയാണ്‌ ഞങ്ങളോട്‌ സൈക്ലിംഗ്‌ പഠിക്കാനും ഉപദേശിച്ചത്‌.പഠിക്കുമ്പോള്‍ വീഴും,മുറിവ്‌ പറ്റും എന്നൊക്കെ മുന്നറിയിപ്പ്‌ തന്നതും ബാപ്പ തന്നെ.നീന്തലും സൈക്ലിംഗും വശമില്ലാത്ത ബാപ്പ നേരിട്ട എന്തെങ്കിലും പ്രശ്നങ്ങളാകാം ഞങ്ങളെ അത്‌ രണ്ടും പഠിപ്പിക്കാന്‍ ബാപ്പ കാട്ടിയ ഔല്‍സുക്യത്തിന്റെ പിന്നിലെ കാരണം....
-അരീക്കോടന്‍.

ഓണ പ്രതിഷേധം

കഴിഞ്ഞ ദിവസം പത്രം വായിച്ചപ്പോള്‍ ആണ് ആ ഞെട്ടിപ്പിക്കുന്ന വാര്‍ത്ത അറിഞ്ഞത് .കേരളത്തില്‍ തുടര്‍ച്ചയായി 4 ദിവസം ഉണങ്ങി വരണ്ട ദിവസങ്ങള്‍ (Dry day) ആയിരിക്കുമത്രേ ! അതും നമ്മുടെ പൊന്നോണ ദിവസങ്ങളില്‍ !നിങ്ങളൊന്നു ഓര്‍ത്തു നോക്ക്, ഒരു ജനകീയ ഗൊവെര്മെന്ടിനു ഇതിലും വലിയ എന്ത് ജന ദ്രോഹം ആണ് ചെയ്യുവാന്‍ പറ്റുക ?..
-ശ്രീരാജ്

ഓര്‍മ്മകള്‍ക്കെത്ര... സുഗന്ധം .. എന്‍ ആത്മാവിന്‍... നഷ്ട സുഗന്ധം ..

ചിങ്ങപ്പുലരികളുടെ ദീപ്ത സ്മരണകള്‍ മനസ്സിന്റെ ചില്ല് ജാലകങ്ങളില്‍ ഗൃഹാതുരതയുടെ നനുത്ത മഞ്ഞു പകരുമ്പോള്‍ രണ്ട് ഓണക്കിളികള്‍ ചിറകടിചെത്തി. അവ ജാലക വാതില്‍ തുറന്നു അകത്തെക്കെത്താനുള്ള വ്യഗ്രതയില്‍ ചിറകടിച്ചു കൊണ്ടേയിരിക്കുന്നു.

മറവിയെന്ന സ്വയം കൃതമായ ജാലക വിരികള്‍ വകഞ്ഞ് മാറ്റി, സ്മ്രിതിയുടെ ചില്ല് ജാലകങ്ങള്‍ ഞാന്‍ അവര്‍ക്കായ്‌ മലര്‍ക്കെ തുറന്നിട്ടു....
-സുനില്‍.

മടങ്ങി വരാത്ത ശബ്ദങ്ങള്‍...

കഴിഞ്ഞ രണ്ടു മാസങ്ങള്‍..... മനസ്സിനെ മരവിപ്പിക്കുന്ന മരണത്തിന്റെ ഗന്ധമുള്ള മണല്കാറ്റ് കടന്നു പോയ നാളുകള്‍..... കാറ്റില്‍ കടപുഴകിയതു...മനസ്സാക്ഷി മരവിക്കാത്ത മലയാളിയുടെ മനസ്സിനെ തണുപ്പിച്ചു തണല്‍ വീശി നിന്ന വന്‍ മരങ്ങള്‍...പ്രണയത്തിന്റെ, പ്രത്യാശയുടെ, അടങ്ങാത്ത ജീവിത ദാഹത്തിന്റെ തണല്‍ വീശിയ വന്‍ മരങ്ങള്‍.. ..... തുടക്കം എവിടെ നിന്നായിരുന്നു.....
-ഉദയന്‍.

തിരിച്ചറിയല്‍ പരേഡ്

ബസ്‌ യാത്രയുടെ സുഖം ഞാന്‍ ഇതിനു മുമ്പ് വയനാട് യാത്രയില്‍ പറഞ്ഞതാണ്.
എം സി എ യ്ക്ക് പഠിക്കുമ്പോള്‍ മിക്കവാറും എല്ലാ ദിവസവും ഞാന്‍ അത് ആസ്വദിച്ചിരുന്നു.
അന്ന് പതിവ് പോലെ രാത്രിയിലെ പത്തു മണിക്കുള്ള തിരുവല്ല ബസ്സിലാണ് കുലശേഖരമംഗലത്ത്‌ ഞാന്‍ വന്നിറങ്ങിയത്. വീടിന്‍റെ വാതിക്കല്‍ തന്നെയാണ് പുഴ. ആരോ കുളിക്കുന്നുണ്ടായിരുന്നു.
ആരാന്നു എനിക്ക് മനസ്സിലായില്ല. അപ്പോഴേക്കും എനിക്ക് ചോദ്യം കിട്ടി കഴിഞ്ഞിരുന്നു...
-സ്നേഹതീരം.

തിരിച്ചറിയല്‍ പരേഡ്

02: അവന്‍ മുഖം ചുളിച്ചു..!

ആ അദ്ധ്യായം വായിക്കുന്നതിനു ‌ മുന്‍പ് ഖുറാന്റെ പൊതു ആഖ്യാന്യ രീതി എന്തെന്ന് ചെറുതായി മനസ്സിലാക്കുന്നത് നന്നായിരിക്കും.. പ്രവാചകനെ മുന്‍ നിര്‍ത്തി ദൈവം മനുഷ്യരോട് സംവദിക്കുന്ന ഒരു രീതിയാണ് വി. ഖുറാന്‍ കൈ കൊള്ളുന്നത്‌ , പ്രവാചകന്റെ ഇരുപത്തി മൂന്നു വര്‍ഷത്തെ പ്രവാചക ദൗത്യത്തിനിടയില്‍് പലപ്പോഴായി അവതരിച്ചതാണ്‌ ഖുറാനിലെ വചനങ്ങള്‍ ... ഈ അദ്ധ്യായത്തിലെ ആദ്യ വചനങ്ങള്‍ പ്രവാചകന്റെ ഒരു നടപടിയെ ദൈവം തിരുത്തുന്നു എന്ന നിലയില്‍ വളരെ പ്രസിദ്ധമാണ് ..
-ഫൈസല്‍ കൊണ്ടോട്ടി.

തിരിച്ചറിവ്............

പറയാനൊരുനൂറു കൂട്ടമെങ്കിലും
ശബ്ദവും വാക്കുകളും
ഞാനിന്നൊളിക്കുന്നു
മൗനം വാചാല‍മാവുന്നു ..
ആ വാചാലത നീയറിഞ്ഞപ്പോള്‍
ഞാനറിയാതൊന്നു ചിരിച്ചു...
ഞാന്‍ ചിരിക്കുന്നത്
നീ കാണുന്നുണ്ടോ?...
..........
മാണിക്യം.

ദളിത കവി

പുന്നെല്ല് വേവുന്നതിന്റെ മണം
പിടിതരുന്നില്ലെങ്കിലും
വയൽത്തണ്ടിന്റെ ഊത്തും
കരഞണ്ടിന്റെ ഇറുക്കും
നനഞ്ഞ മണ്ണിളകുമ്പോൾ
കലപ്പനാവിൽ നിന്നുയരുന്ന
മന്ത്രവാദവും മറന്നിട്ടില്ല..
............
സനാതനന്‍.

പൊക്കിള്‍കൊടിയിലെ രക്തം

കലങ്ങിച്ചുവന്നെന്‍ കണ്ണിനും
വെന്തടിഞ്ഞ മാംസത്തിനും
അച്ഛന്റെ ചോരയുടെ മണമാണെന്ന്
മറന്നു കളഞ്ഞതാണോ അച്ഛന്‍?
കരച്ചിലിന്‍ പൂമുഖത്തും
ഞാന്‍ ചിരിച്ചല്ലേ ഉള്ളൂ എന്നും?..
...........
ശ്രദ്ധേയന്‍.

ഓര്‍മ്മ പിണക്കം

ഹൃദയ ചുംബനങ്ങളില്‍
എന്‍റെകാല്‍ വരിഞ്ഞുകെട്ടിയിരുന്നപ്പോള്‍
നിന്‍റെ സ്നേഹത്തിന്‍റെ
വരമ്പുകള്‍ ഞാന്‍ അളക്കുകയായിരുന്നു .
എന്‍റെ സ്വബോധത്തില്‍ നീ പകര്‍ന്ന
സ്നേഹത്തിനു കൈപ്പയിരുന്നു..

..........

പാവപ്പെട്ടവന്‍